21/07/2021
https://www.facebook.com/246812222184086/posts/1753995901465703/
💊ကိုယ်ခံအားမြှင့်ဖို့ အားဆေးများနှင့် ကိုဗစ်ဝေဒနာ သက်သာဆေး အမျိုးမျိုးတို့ကို ဒီရက်ပိုင်းတွေမှာ Social Media များတွင် ညွှန်းဆိုဖော်ပြနေတာ တွေ့နေရပါတယ်။ ဒါကြောင့်မို့ COVID-19အတွက် အသုံးပြုလေ့ ရှိနေတဲ့ ဆေးတွေရဲ့ အကျိုးဆက်များကို လေ့လာမှတ်သားမိသမျှ မျှဝေပေး လိုပါတယ်ရှင်။
🍋Vitamin C
အနာကျက်နှုန်းမြန်၊ ကိုယ်ခံအား ကောင်းစေ၊ နာလန်ထမြန်စေတဲ့ Vitamin C ဟာ လူတဦး တနေ့တာမှာ 65-90mg သာလိုအပ်ပါတယ်။ ဒါပေမယ့် တန်ဆေးလွန်ဘေး ဆိုသလို တနေ့ကို 1000mg ထက် ပိုသောက်မိရင် ဝမ်းပျက်တာ၊ ဆီးကျောက်တည်တာမျိုး ဖြစ်နိုင်ပါတယ်။
🐟Vitamin D
Vitamin Dကြောင့် ကိုဗစ်ကို ကာကွယ်တယ်/ သက်သာတယ်ဆိုတဲ့ အထောက်အထားများ လုံလောက်စွာ မတွေ့ရသေးပါ။ လူတဦးအတွက် နေ့စဉ်Vitamin D3 800-1000IU လိုပါတယ်။ အကယ်၍ ဖြည့်စွက်ချင်ရင် အရင်ဆုံး ကိုယ်ထဲက Vitamin Dပမာဏကို စစ်ဆေးပြီးမှပဲ သောက်သင့်ပါတယ်။ Vitamin Dလွန်ကဲရင် ခေါင်းကိုက်၊ ပျို့အန်၊ ပါးစပ်ပျက်၊ အိပ်ငိုက်နုန်းချိတဲ့ ဘေးထွက် ဆိုးကျိုးတွေ ရှိပါတယ်။ ဒါတွေက ကိုဗစ်ရဲ့ လက္ခဏာတွေနဲ့လည်း ဆင်တူနေလို့ Vitamin D ကို အလွန်အကျွံ မသောက်ထားဖို့ သတိပြုစေချင်ပါတယ်။
🌿Vitamin K
ဒါလည်း ဆရာဝန်မညွှန်ဘဲ အလွန်အကျွံ မသောက်သင့်ပါ။ လွန်ကဲပါက ဗိုက်နာခြင်း၊ ဝမ်းပျက် ဝမ်းလျှောခြင်းစတဲ့ ဘေးထွက်ဆိုးကျိုးတွေ ရှိပါတယ်။ Vitamin Kအဓိက လိုသူများက သွေးထွက်လွန်သော ရောဂါရှင်များ ဖြစ်ပါတယ်။ သာမန်လူများအတွက် နေ့စဉ်လိုအပ်သော Vitamin Kပမာဏ (90-120mcg) ကို အစိမ်းရင့်ရောင် အသီးအရွက်များများ စားပေးခြင်းဖြင် လုံလောက်စွာ ရနိုင်ပါတယ်။
🐣Zinc
လူတဦး တနေ့တာ လိုအပ်ချက်က 20mgဆို ရပါပြီ။ အဲ့ထက်အများကြီး ပိုသောက်မိရင် အော့အန်ခြင်း၊ ကျောက်ကပ်ထိခိုက်ခြင်း၊ ဖျားနာခြင်းတွေ ဖြစ်စေတတ်ပါတယ်။
**ဗီတာမင်ဆေးတွေကို တနေ့တာ လိုအပ်ချက်ထက် များစွာပိုပြီး သောက်ရင် ကျောက်ကပ်က ဒါတွေကို စစ်ထုတ်ဖို့ အလုပ်ပိုလုပ်ရတော့ ကြာလာရင် ကျောက်ကပ် ထိခိုက်လာတတ်ပါမယ်။ အားဆေးတွေဆိုတာ လုံလောက်အောင် မစားနိုင်သူများ အတွက်သာ အဓိကလိုအပ်တာပါ။ သာမန်လူများအတွက် အစာအာဟာရကိုသာ ကျန်းမာရေးနှင့် ညီညွတ်ပြည့်ဝစွာ စားသုံးပေးနိုင်ရင် လုံလောက်ပါတယ်။**
🎯Antibiotics (eg. Azithromycin, Amoxicillin, Ampicillin)
ဒါတွေက ဘက်တီးရီးယား ပိုးသတ်ဆေးတွေဖြစ်ပြီး ကိုဗစ်က ဗိုင်းရပ်စ်ပိုး ဖြစ်ပါတယ်။ မပြင်းထန်တဲ့ ကိုဗစ်လူနာမှာ ပိုးသတ်ဆေး မလိုပါဘူး။ ဘယ်အချိန်မှ လိုလဲဆိုရင် ကိုဗစ်ရဲ့ နောက်ဆက်တွဲ ဘက်တီးရီးယားပိုးများ ဝင်လာတဲ့ အခြေအနေမျိုး (eg.အဆုတ်ရောင်ခြင်း)ကျမှ ဆရာဝန်က ချင့်ချိန်သုံးရမယ့် ဆေးများဖြစ်ပါတယ်။ ဒါကြောင့်မို့ စဖျားတာနဲ့ Azithromycin အပါအဝင် ပိုးသတ်ဆေးတွေကို ကိုယ့်ဘာကိုယ် ကြိုမသောက်ထားသင့်ပါ။ တတ်ကျွမ်းနားလည်တဲ့ ဆရာဝန်နှင့် တိုင်ပင်ပြီး လိုအပ်မှပဲ သောက်ပါ။ ပိုးသတ်ဆေးယဉ်ပါး ပြဿနာက ကြီးပါတယ်။ နောက်ပိုင်းလိုအပ်လို့ ပိုးသတ်ဆေးပေးရင် ဆေးမတိုးတော့တာမျိုး ဖြစ်နိုင်ပါမယ်။
💉Remdesivir
ဗိုင်းရပ်စ်ပိုးသတ်ဆေး တမျိုးဖြစ်တဲ့ ဒီဆေးက ဝေဒနာပြင်းထန်ပြီး အသက်ရှူစက် သုံးနေရတဲ့ ကိုဗစ်လူနာတွေမှာ အနီးကပ် စောင့်ကြည့်ပြီး သွေးကြောထဲ ထိုးပေးရင် အောက်ဆီဂျင်ပြန်တက်ဖို့ အကျိုးပြုပါတယ်။ အတန်အသင့် အောက်ဆီဂျင် ကျဆင်းလူနာများမှာတော့ အကျိုးပြုမှုက ထူးခြားစွာ မတွေ့ရဘူးလို့ ဆိုပါတယ်။ ဆေးရဲ့ဘေးထွက် ဆိုးကျိုးများအဖြစ် သွေးပေါင်ချိန်ကျခြင်း၊ အသည်း၊ ကျောက်ကပ် ထိခိုက်ရောင်ရမ်းခြင်း၊ ဆေးမတည့်ခြင်းများလည်း ရှိနိုင်လို့ လူနာတိုင်းကိုလည်း သွင်းလို့မရပါဘူး။
💊Favipiravir
သာမန်တုပ်ကွေးမှာ သောက်လို့ရတဲ့ ဗိုင်းရပ်စ်သတ်ဆေးဖြစ်ပြီး တုပ်ကွေးဝေဒနာများကို အမြန်သက်သာစေပါတယ်။ သိပ်မဆိုးတဲ့ ကိုဗစ်လူနာများမှာ သုံးတာမျိုးတော့ ရှိပေမယ့် COVID-19 နှင့် ဒီဆေးရဲ့ ဆက်စပ်မှုနဲ့ အာနိသင် ထိရောက်မှုတွေကို သေချာလေ့လာထားတဲ့ ဖော်ပြချက်မျိုးတွေ များစွာမတွေ့ရသေးပါဘူး။
📌Steroids (eg. Dexamethaxone, Prednisolone, Methylprednisolone)
အောက်ဆီဂျင်ကျတဲ့ လူနာများမှာသာ လိုတာပါ။ ဆေးကိုသုံးပြီးရင် တန်းရပ်ဖို့လည်း မသင့်ပါဘူး။ dose ကို တဖြည်းဖြည်း လျှော့ပြီးမှ ရပ်ရပါတယ်။ ဆေးရဲ့ဘေးထွက် ဆိုးကျိုးများက သွေးတွင်းသကြားဓာတ် (Glucose) တက်တတ်ပြီး Potassium ကျတတ်လို့ ဆီးချို၊ ကျောက်ကပ် လူနာများမှာသုံးဖို့ သေချာချိန်ရပါမယ်။ ဒီဓာတ်တွေ အတက်အကျဖြစ်ရင် ဆေးတွေထပ်လိုက်ပြီး ကုရပါတယ်။ Steroids ဆေးများဟာ ကိုယ်တွင်း ရောင်ရမ်းမှုတွေကို လျော့ကျစေသော်လည်း ကိုယ်ခံအားကိုပါ တပြိုင်တည်း ကျသွားစေပါတယ်။ ဒီဆေးတွေကို dose မချိန်တတ်ဘဲ အလွယ်တကူ ဝယ်သောက်နေရင် နောက်ဆက်တွဲ ဆိုးကျိုးကသာ ပိုများစေမှာပါ။
💊COVID-19က ပျောက်တဲ့ဆေးရယ်လို့ မရှိသေးပါဘူး။ ကိုယ်ခံအားတက်ဖို့နဲ့ ဝေဒနာသက်သာဖို့ သုံးနေကြတဲ့ ဆေးတွေဟာလည်း တန်ဆေးလွန်ဘေး ဆိုသလို ချင့်ချိန်သင့်တဲ့ ဆေးဝါးများ ဖြစ်ပါတယ်။ COVID-19 ဆိုတဲ့ ရောဂါဟာ ဆေးတွေကိုချည်း အားကိုးလို့မရဘဲ ကိုယ်ခံအားနှင့် စိတ်ခွန်အားများဖြင့် အဓိက တိုက်ထုတ်ရမယ့် ရောဂါမျိုး ဖြစ်ပါတယ်။ ဒါကြောင့်မို့ မဖြစ်သေးခင်မှာ အစွမ်းကုန် ကာကွယ်မယ်။ အာဟာရ ရှိတာတွေစားပြီး ကိုယ်ခံအားတွေ မြှင့်တင်ထားမယ်။ ဖြစ်လာရင်လည်း စိတ်ဓာတ်ခွန်အားရှိစွာနဲ့ COVID-19 ကို အားမလျှော့စတမ်း ရင်ဆိုင်တိုက်ပြီး အနိုင်ယူကြပါလို့ မေတ္တာဖြင့် မျှဝေပေးအပ်ပါတယ်ရှင်။ 💐
‘ကပ်ရောဂါဘေးမှ အမြန်ဆုံးလွတ်ကင်း ကျန်းမာကြပါစေလို့ အာရှတော်ဝင်ဆေးရုံ မိသားစုမှ ဆုတောင်းမေတ္တာ ပို့သအပ်ပါတယ်ရှင်။’
