RADIO OASIS 106.4 Vakinankaratra

27/09/2024

Antsan-kira Groupe Fanantenana
Zoma 27 Septambra 2024

24/03/2023

AOKA HOBEAZINA NY FON'NY ZAZA

" Ny manabe ny saina kanefa tsy manabe ny fo , dia tahaka ny tsy manabe ihany " , hoy i Aristote , ilay filôzôfa malaza fahizay .

Ny fanabeazana ny fo no adidin'ny ray sy ny reny voalohany amin'ny zanany , dieny mbola any am- bohoka izy . Dia ny manao izay hahatsapan'ny zaza fa olona tiana izy ; ekena ny fisiany . Beazina izy mba ho afaka hizara fitiavana amin'ny hafa ihany koa .

Ny fitiavan- tena ratsy , ny fanambanian- tena , ny famonoan- tena , ny fankahalana sy ny herisetra atao amin'ny hafa , dia tsy avy aiza tsy akory , fa vokatry ny tsy fisian'ny fanabeazana ny fo hatrany amin'ny fahazazana kely .

Tsy ho afaka ny hanome ny tsara ho an'ny tenany sy ho an'ny hafa amin'ny zavatra tsara tsy nomena azy mihitsy ny zaza .

Ny zaza tezaina ao anatin'ny fangejana , ny tahotra sy ny horohoro ; ny zaza zarina amin'ny fandevilevena sy ny fanamelohana lava ; ny zaza tsy raharahiana , dia hanao tahaka ny vanja milevina , ka ho zava- doza ny haterany rehefa tonga ny andro hampipoaka azy .

Averina ihany , fa ny fanabeazana dia resaka fifandraisana aloha . Ny fifandraisana tsara dia manampy ho amin'ny safidy tsara ataon'ny zaza .

Miantoka ny mahavanona ny olona iray manontolo ny fanabeazana ny fo , satria " avy ao aminy no iavian'ny aina . "
Ohabolana 4 : 23b

Raoeliarijao

15/03/2023

MANABE ANTSIKA KOA NY ZAZA

Tsy manabe ny zaza ihany isika satria ray aman-dreny ; fa manabe antsika koa ny zaza mba hahatonga antsika ho ray aman-dreny .

Manabe antsika hitombo fitiavana ny zaza .
Manabe antsika handray andraikitra izy .
Manabe antsika hanana faharetana izy .
Manabe antsika hanana fandeferana izy .
Manabe antsika hahay mihaino izy .
Manabe antsika ho tsotra sy marina izy .
Manabe antsika hahay manetry tena ny zaza.

Mandritra ny androm-piainantsika dia mianatra ny maha- ray aman-dreny isika amin'ny alalan'ny fifandraisantsika amin'ny zanatsika .

Raoeliarijao

03/03/2023

27/01/2023

Healing VOICE

06/12/2022

IREO ZAVATRA DIMY (5)
TENA ILAIN'NY ZAZA

Tsara ny hahafantarantsika ray aman-dreny ireo filan'ny zaza , izay miara- miasa mba hampivelatra amin'ny fahafenoany ny maha-olona azy : ara-batana , saina , fanahy , fiaraha- monina , ara-pihetseham-po .

Anisan'ireo zavatra tena ilain'ny zanakao ireto dimy (5) tanisaina manaraka ireto :

1) Mila fihetsehana ny zaza : mihetsika , mandady , mandeha , mihazakazaka , mitsambikina , sns . Ara-dalàna ny fihetsehan'ny zaza tahaka izany , izay midika ihany koa fa salama izy .

2) Mila fifandraisana amin'olona ny zaza : miresaka , mitantara , maneho hevitra , henoina , mihomehy , sns . Ny rainy sy ny reniny no olona voalohany tokony hifandray tsara amin'ny zaza ; dia izay vao ny namana sy ireo olon-kafa .

3) Mila lalao ny zaza : aminy dia tsy fandaniana andro na fialam- boly ny lalao fa fiainany mihitsy . Ilainy ny milalao samirery , fa ilainy tahaka izany koa ny miara- milalao amin'ny hafa .

4) Mila fiarovana ny zaza : satria mbola marefo amin'ny lafin-javatra maro izy , dia mila olona afaka ny hiaro azy . Ny ray sy ny reniny no olona inoan'ny zaza fa azony antoka indrindra hiaro azy eo amin'ny fiainana . Ao anatin'io fiarovana io ny filaminana sy ny fitoniana ao an-tokantrano .

5) Mila fifandraisana amin'ny zavaboary ny zaza : milalao amin'ny tany , fasika ; mifandray amin'ny rano , ny vato , ny zava-maniry , ny hazo , sy ireo biby maha te ho tia . Mitaiza ny fihetseham-pon'ny zaza ny fifandraisana amin'ny zavaboary no sady maneho aminy rahateo ny asatanan' Andriamanitra .

Satria filana voajanahary ho an'ny zaza ireo zavatra dimy (5) ireo dia adidintsika ray aman-dreny ny miezaka manaiky sy manao izay hahatanteraka izany araka izay azontsika atao .

Raha mitady na manao ireo zavatra ireo ny zanakao dia aoka tsy horaisinao ho ditra na filana vaniny akory izany . Mifalia fa ara-dalàna tsara izy .

Mila fandeferana kely sy faharetana betsaka avy amintsika ny zaza . Mila fanaraha- maso tsara ihany koa anefa .

Raoeliarijao