26/12/2025
“Ny Iriko ho Anao”
Enga anie ho mora
ny dian’andro lalovanao,
ho miadana
ny ora mikoriana ao.
Enga anie ny làlana
hitondra anao ho tianao,
na dia miolaka aza
tsy hahavery ny fanahinao.
Raha misy safidy
mitsangàna eo anoloana,
fidio ilay miteny
amin’ny fonao tsisy fandrika.
Raha varavarana iray
no mihidy tampoka,
dia mandehana hatrany
mandra-pahita hazavana.
Raha mangatsiaka
izao tontolo iainanao,
asehoy amin’ny tsiky
ny hafanan’ny fanahinao.
Fa mihoatra noho izany
mihoatra noho ny teny
enga anie ity fiainana
ho tonga araka izay irin’ny nofinao.
Aoka ny nofinao
ho avo toy ny lanitra,
ary ny ahiahinao
ho kely tahaka vovoka an-dàlana.
Aza mitondra entana
mihoatra ny zakanao,
fa ny soroka reraka
tsy ahitana fahendrena.
Ary eny an-dàlana
izay alehan’ny tongotrao,
enga anie hahalala ianao
fa misy fo iray miandry anao.
Fo iray tia
tsy mila tambiny,
fa mitovy faniriana
amin’ny nofinao anio sy rahampitso.
Aza adino ny lasa
na ireo tia tavela,
fa ny heloka avelao
hanadio ny dian-tongotrao.
Raiso ny fahadisoana
ataovy lesona mamiratra,
ary omeo bebe kokoa
noho izay raisinao an-tànana.
Fa farany indrindra,
raha mbola misy iriko,
dia izao fotsiny:
mba ho to
ny fiainanao,
ho velona ny nofinao,
ary hahalala foana ianao
fa nisy
nisy
tia anao
tsy nisy fetra.
"Mahazava 26/12/2025"
