19/02/2023
آول تجربة ليا في تصميم واجهات المُستخدم UI/UX 🥷
إسم التطبيق :
مهام السماوراي - Samurai Tasks
وظيفة التطبيق :
تطبيق مُخصص للمصممين والمنتجين للفيديو المتحرك ، يعطي التطبيق مساحة خاصة للمُصمم والمنتج لتسجيـل كل مهامه اليومية والآسبوعية عليه ( أشغاله ) ليتم تجهيزها لهُ وتكون بصورة تحمسك للخدمة وتخليك تكمل مهامك وتسلمها في موعدها مع بعض التحديات اللي التطبيق يوفرهالك بش تخدم آسرع وتعطي نتائج أفضل ، التطبيق غير رسمي الى حد اللحظة فقط مشروع مطروح وفكرة جتني حاولت نطبقها ، فيه اكثر من ميزة تعطيك الراحة للعمل عليه
كتحديات ليك وهذا شي مزال متعمقتش فيه داخل التطبيق او حددت الفكرة متاعه بالزبط ، يعطيك اوقات للتدريب الشخصي في خانة التدريب ( تحدد مدة زمنية داخله انه عندي صورة فولانية للشخص الفولاني حنحاول نتدرب عليها ) وتكمل تحدياتك اليومية وتستمر مع التطبيق وتنافس اصدقائك بمستواك وتقدمك داخل التطبيق اللي بعد مدة حيكون ليه حوافز بش تقعد تخدم وتقدم اكثر ، زي ماقلت هذا أول تجربة ليا كتصميم واجهة مستخدم ( تطبيق ) استخدمت الساموراي كشخصية للتطبيق فقط بش تحس انه حد يحفز فيك داخل التطبيق وميكونش جاف تكتب وتطلع الساموراي حيساعدك ديما ف كل شي ويفكرك بوقت خدمتك و يعطيك نصايح كيف تطور من نفسك وتخدم بشكل افضل وصورة سريعة و يخليك تسلم شغلك ف موعده ، تقدرو تشوفو التطبيق كشكل آولي ( في رابط البيهاينس في آول تعليق 👇 ) 🥷🤍
آي فكرة او ملاحظة نقدر نستفيد بيها ونطوره تقدر تكتبهالي ف تعليق حتفيدني لو كانت ابسط من البسيطه ، متبخلش بـ شير وتعليق خلي يطلع اكثر ونستفيد بآكثر من رآي ، هذا هو و آسف طولت عليك 🥷
