29/09/2026
នាព្រឹកថ្ងៃអង្គារ ៣ រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៩ ខែកញ្ញា ឆ្នាំ២០២៦ ក្រុមហ៊ុន ខាស-ប៊ីហ្ស ថេកណឡជី ដោយមានកិច្ចសហការ និងការគាំទ្រពី វិទ្យាស្ថានពហុបច្ចេកទេសភូមិភាគតេជោសែនសៀមរាប (RPITSSR) បានរៀបចំកម្មវិធីចែករំលែកបទពិសោធន៍ ក្រោមប្រធានបទ «ការអភិវឌ្ឍជំនាញវិជ្ជាជីវៈផ្នែកគណនេយ្យ ដើម្បីត្រៀមខ្លួនចូលទីផ្សារការងារ» ដោយ លោកស្រី សាត សុខុន Assistant Vice President នៃក្រុមហ៊ុន ខាស-ប៊ីហ្ស ថេកណឡជី ជូនដល់និស្សិតផ្នែកគណនេយ្យ និងទីផ្សារ ។
ក្នុងឱកាសបើកកម្មវិធី លោក ប៊ី សារ័ត្ន អនុប្រធានដេប៉ាតឺម៉ង់គ្រប់គ្រងពាណិជ្ជកម្ម នៃវិទ្យាស្ថាន RPITSSR បានមានប្រសាសន៍លើកទឹកចិត្តដល់និស្សិត និងលើកឡើងអំពីសារៈសំខាន់នៃវគ្គសិក្សា QuickBooks Online Certified User ដែលបញ្ជាក់ពីចំណេះដឹង និងជំនាញក្នុងការប្រើប្រាស់ QuickBooks Online ព្រមទាំងការទទួលបានចំណេះដឹង ជំនាញអនុវត្ត និងវិញ្ញាបនបត្រវិជ្ជាជីវៈ នឹងជួយបង្កើនការត្រៀមខ្លួន និងបន្ថែមសមត្ថភាពប្រកួតប្រជែងរបស់និស្សិតនៅពេលស្វែងរកឱកាសការងារនាពេលអនាគត ស្របពេលដែលបច្ចេកវិទ្យាកំពុងមានការរីកចម្រើន ។
🎯 កម្មវិធីនេះមានគោលបំណងសំខាន់ៗ៖
🔹 ផ្សារភ្ជាប់ចំណេះដឹងពីថ្នាក់រៀនទៅនឹងការអនុវត្តជាក់ស្តែង៖ ដើម្បីឱ្យនិស្សិតយល់កាន់តែច្បាស់អំពីជំនាញវិជ្ជាជីវៈ និងតម្រូវការជាក់ស្តែងនៃទីផ្សារការងារ។
🔹 ជំរុញការត្រៀមខ្លួនសម្រាប់អាជីពនាពេលអនាគត៖ តាមរយៈការអភិវឌ្ឍជំនាញបច្ចេកទេស ការប្រើប្រាស់កម្មវិធីគណនេយ្យ និងការស្វែងយល់អំពីវិញ្ញាបនបត្រអន្តរជាតិ។
🔹 ពង្រីកទស្សនវិស័យអំពីអាជីព និងការអភិវឌ្ឍខ្លួន៖ ដើម្បីជួយឱ្យនិស្សិតស្វែងយល់ពីឱកាសការងារ កំណត់ទិសដៅអាជីពរបស់ខ្លួនបានកាន់តែច្បាស់ និងបង្កើនភាពជឿជាក់ក្នុងការត្រៀមចូលទីផ្សារការងារ។
