27/08/2026
ថ្មីៗនេះ ក្រុមហ៊ុន នីលីដា សហការជាមួយក្រុមហ៊ុនជីជប៉ុន Japan Vietnam Fertilizer (JVF) ចុះយកសំណាកដីពីចម្ការកាហ្វេរបស់សមាជិកសមាគមកាហ្វេកម្ពុជាចំនួន ៨ ចម្ការ នៅខេត្តមណ្ឌលគិរី ។
ការយកសំណាកដី ទៅធ្វើតេស្តនេះ មានគោលបំណង៖
· ដឹងពីកម្រិតអាស៊ីត-បាស (pH) ៖ ការដឹងពីកម្រិត pH ជួយឱ្យកសិករអាចកែប្រែដី (ដូចជាបាចកំបោរកសិកម្ម) ឱ្យត្រូវតាមស្តង់ដារមុនពេលដាំ។
· កំណត់បរិមាណជីបានត្រឹមត្រូវ៖ ការតេស្តជួយវាស់ស្ទង់កម្រិតសារធាតុចិញ្ចឹមចម្បង (អាសូត, ផូស្វ័រ, ប៉ូតស្យូម) និងសារធាតុបន្ទាប់បន្សំ (ស័ង្កសី, ដែក, ប៊រ) ដែលមានស្រាប់ក្នុងដី ដើម្បីឱ្យកសិករទិញ និងប្រើប្រាស់តែជីណាដែលដីកំពុងខ្វះខាតពិតប្រាកដ ។
· សន្សំសំចៃថវិកា ៖ ការបាចជីដោយមិនបានពិនិត្យដី ធ្វើឱ្យខាតបង់ថវិកាច្រើន។ ការដឹងពីតម្រូវការពិតប្រាកដជួយកាត់បន្ថយការទិញជីលើសកម្រិត និងបង្កើនប្រាក់ចំណេញ។
· ការពារការបំពុលបរិស្ថាន៖ ការប្រើប្រាស់ជីគីមីច្រើនហួសប្រមាណ នឹងហូរចូលទៅក្នុងប្រភពទឹក បណ្តាលឱ្យខូចគុណភាពទឹក និងប៉ះពាល់ដល់ប្រព័ន្ធអេកូឡូស៊ីក្នុងតំបន់។
ហានិភ័យនៃការមិនបានធ្វើតេស្តដី បើកសិករដាំដុះដោយគ្មានទិន្នន័យដីច្បាស់លាស់ ពួកគាត់អាចប្រឈមនឹងការដាក់ជីតិចពេក (ធ្វើឱ្យដំណាំក្រិន ស្លឹកលឿង ទិន្នផលទាប) ឬការដាក់ជីច្រើនជ្រុល (ធ្វើឱ្យរលាកឫសដំណាំ ដីឡើងជាតិពុល និងខូចរចនាសម្ព័ន្ធដីរយៈពេលវែង ដែលត្រូវចំណាយប្រាក់ច្រើនណាស់ដើម្បីស្តារឡើងវិញ) ៕
