Tauprojecthk

09/07/2016

【「明月千里」膺三料馬王】

有「馬壇奧斯卡」之稱的冠軍人馬獎昨晚於君悅酒店隆重舉行，「明月千里」成為大贏家，此駒成功複製「雄心威龍」及「威爾頓」的馬王路，一季內接連攻下打吡及女皇盃兩項一級賽，結果獲選為最佳中距離馬及最受歡迎馬匹，加上馬王銜頭，成為實至名歸的三料冠軍。

昨晚冠軍人馬獎有多位馬主及騎練出席，大摩、蔡約翰、莫雷拉、潘頓及蔣嘉琦等均有亮相，「明月千里」眾望所歸成為三料馬王，此駒一季內贏得打吡及女皇盃兩項G1殊榮，結果獲選為最佳中距離馬，而在超過30萬人投票的最受歡迎馬匹選舉，此駒得票率39.3%獨佔鰲頭，加上馬王殊榮，成為三料冠軍。

上年馬王寶座「步步友」及「友瑩格」各有支持者，但今年「明月千里」則一枝獨秀，此駒雖在四歲系列首兩關飲恨負於「首飾太陽」，但在重頭戲打吡大賽則展現真正實力，不僅替大摩五奪打吡殊榮，其後更於女皇盃大勝本地及海外一眾年長馬。季尾雖未能於遮打盃再下一城，仍無礙評審對此駒鍾愛，繼前年「威爾頓」後，成為另一匹四歲三料馬王。

大摩連續四年炮製出「軍事出擊」、「威爾頓」、「步步友」及「明月千里」成為馬王，練者在頒獎禮後表現得非常興奮，並與馬主及獎座合照。馬主程凱信表示：「自己名下愛駒成為馬王，實在難以置信，『明月千里』下季目標將是香港盃及女皇盃。」此駒今季累積獎金高達2,918萬元，程凱信可謂名利雙收。

08/07/2016

【22歲祈普敦來季加入戰團】

正當以為來季無騎師加入戰團之際，今日牌照委員會就帶嚟好消息，事關年僅22歲嘅澳洲好手祈普敦獲發公司騎師牌照，有效期由2016年7月11日至2016年12月3日，即係佢可以喺來季頭三個月上陣。

咪以為祈普敦只得22歲冇料到，原來佢16歲開始策騎出賽，17歲時在玫瑰崗馬場主策「旺東」攻下2011年節日錦標，首次贏得大賽冠軍，兼且喺2012/2013及2013/2014年度連續兩個馬季榮膺新南威爾斯冠軍見習騎師。成為大師傅後，祈普敦大多為練馬師奧詩（高多芬馬房）效力，並在高多芬馬房的鼎力支持下取得優異成績，包括勝出五項二級賽。

另外，祈普敦至今贏咗354W，佢喺2014/2015年度馬季登上悉尼騎師榜前十名。至於今年嘅悉尼秋季賽馬嘉年華，祈普敦策騎由恩師昆頓訓練嘅「偷偷看」勝出一級賽古摩亞經典大賽，首嚐一級賽勝果，相隔一個禮拜憑活侯夫人馬房的「英利殊」攻下一級賽全齡錦標。佢最低出賽造磅為117磅，加上可容許的超磅，他可以接受負磅為115磅馬匹嘅策騎聘約。

08/07/2016

【大運財走去法國跑G1】

高伯新馬房「大運財」早前喺英國皇家雅士谷賽期，出戰一級賽鑽禧錦標跑獲亞軍，擸走超過140萬港元獎金，但冇得揚威海外硬係唔圓滿。有見及此，此駒已報戰8月7日於法國多維爾馬場舉行嘅1300米一級賽紀爾斯大賽，且看能否為港爭光。

05/07/2016

【岳帥真命天女又準備單騎表演】

如果講近代歐洲最具爭議性嘅騎師，范義龍肯定榜上有名，呢位現年51歲嘅名將，曾經六度登上英國冠軍騎師寶座，兼且贏大賽無數，包括六奪英國二千堅尼、三勝葉森打吡，亦曾兩度揚威法國凱旋門大賽。另一邊廂，范義龍曾捲入造馬案，亦試過被驗出服用禁藥要長期停賽，堪稱天使與魔鬼化身。

經過唔少風風雨雨，范義龍今年決定重返祖家愛爾蘭替練馬師岳禮翰效力，兼且喺當地贏咗9W，成績唔算太差。不過，今日就有消息指出由於長期受到抑鬱症所困擾，范義龍決定掛靴，結束佢充滿傳奇色彩嘅騎師生涯。

根據一直負責治療范義龍嘅醫生Dr Adrian McGoldrick透露，原來范義龍一直患有抑鬱症，並要長期服食抗抑鬱藥，最近更表示失去策騎動力，因此決定退休。

05/07/2016

【岳帥真命天女又準備單騎表演】

岳伯仁馬房近年玩盡英愛各項經典大賽，不過呢排佢就頗為運滯，旗下馬先後兩次輸畀阿加汗隻「夏辛村」失落英愛打吡，之後「啹喀兵」日蝕大賽又輸埋畀藍營隻名不經傳嘅「鷹爪刀」，似乎古摩亞今年批三歲雄馬真係擔唔起大旗。反而馬女Minding卻近乎戰無不勝，隨時係集團實力最強嘅真命天女。

Minding早前喺美寶莉錦標大炒班年長馬女之後，下周就會返到三歲馬女戰線，出戰卻拉馬場嘅愛爾蘭橡樹大賽。今次陣前更加傳來好消息！佢今場其中一個勁敵，前杜拜司馬經典賽冠軍「多利美」個囡囡So Mi Dar再度因傷退出，變相Minding今鋪又少一隻對手。So Mi Dar之前已因腳傷放棄葉森橡樹大賽，今次又因康復進度未如預期搞到退賽，即係話最快都要等到秋天先有機會再見到佢喇。

而岳伯仁經過幾場敗仗後，都不得不出殺著。佢已經幫Minding報名9月份嘅愛爾蘭冠軍錦標，睇嚟岳帥真係對旗下班仔都唔係太有信心。上年「金號角」都係贏完呢場再贏埋凱旋門大賽，又睇吓Minding有冇機會複製呢條贏馬方程式，幫古摩亞爭番啖氣。

30/06/2016

【Yen勁升！田泰安日本客串！】

雖然日本上半年G1賽期已經圓滿結束，不過當地跑馬全年無休，唔少騎師都會趁暑假去短期客串，更何況近期啲Yen升番唔少，唔搵你就笨。早前講過莫雷拉會喺8月尾到日本獻技三周，除咗參與世界星級騎師賽之外，仲會喺二級賽札幌記念再度夥拍馬王「滿樂時」參戰。

最新消息，在港長期發展嘅田泰安亦會去日本湊熱鬧！安仔今年首度獲日本中央競馬會發牌，7月16至30日於當地上陣六期函館及札幌賽事。田泰安一早已經希望得到呢個機會，上年因為受傷去唔成，相當可惜，好彩今年得到「滿樂時」練馬師堀宣行介紹，終於可以去一個從未上陣過嘅地方挑戰自己。

過往，香港一向係外國騎師嘅客串天堂，不過自從雷神一人獨大之後，加上日本馬圈對外國騎師愈來愈開放，搞到近年香港有被追過之勢，布文、貝湯美等好手今年都曾前往日本客串，並取得唔錯成績，睇嚟日本真係騎師掘金嘅好地方。

30/06/2016

【日軍唔爆機？ 自己打爆佢啦！】

日本人心目中都有一個凱旋門大賽「爆機夢」，不過當地唔似得香港，可以睇到世界各地嘅轉播賽，即使幾乎年年派馬挑戰凱旋門，但馬迷只係有得睇冇得賭，要投注支持恐怕要親身飛轉法國。

不過，今年就唔同講法，因為日本國會通過，日本中央競馬會(JRA)今年秋天起開始受注有日本馬出戰嘅海外賽事，頭炮當然係應屆打吡盟主「豐收節」都會過去挑機，10月2日喺尚蒂伊馬場舉行嘅凱旋門大賽，馬迷可用網上戶口投注獨贏、位置、連贏、位置連贏、單T、三重彩等多個獨立彩池。稍後嘅墨爾本盃及四場香港國際賽，都會喺當地直播兼受注。

等咗咁多年終於有得玩，投入感都唔同啲，就算日本隊去法國未打得爆機住，馬迷有得自己中馬贏錢都唔錯吖！

27/06/2016

【夏辛村包辦英愛打吡孖寶】

近代其中一匹最出色賽駒「海都之星」，喺2009年橫掃歐洲馬壇，先後攻下葉森打吡、朱德望國際錦標同埋愛爾蘭冠軍錦標各項一級賽，當時名牌練馬師岳伯仁派出「名譽尊榮」(Fame And Glory)、「匠心獨運」(Mastercraftsman)同埋「李伯大夢」(Rip Van Winkle)呢個鐵三角組合多番圍攻，可惜依然「海都之星」一一擊敗。

估唔到嚟到今年，岳伯仁極有可能又要面對同一困境，咁啱今次嘅主角就係「海都之星」子嗣「夏辛村」(Harzand)喇。呢匹由大馬主阿加汗擁有嘅三歲馬，繼早前喺英國葉森打吡力壓岳伯仁雙雄「巡邏兵」(US Army Ranger)同埋「愛達荷州」(Idaho)後，剛周末喺愛爾蘭卻拉馬場上演嘅G1愛爾蘭打吡，「夏辛村」再次擊敗「愛達荷州」，成功包辦英愛打吡孖寶，認真犀利。

至於「夏辛村」能否好似老竇「海都之星」一樣，以三歲馬身份勇奪法國凱旋門大賽？大家不妨拭目以待。

27/06/2016

【大鳴大放又傷 豐收節去打爆機】

去年囊括日本二冠嘅「大鳴大放」，今年傷愈復出後滿腹大計，可惜三月底遠征杜拜司馬經典賽，不敵「容後再決」飲恨獲亞。而喺尋日馬會轉播嘅2200米一級賽寶塚紀念賽，再次姍姍來遲，輸畀「勝之石」跑第二名，連續兩場G1做阿二。

不過，最慘都唔係呢樣，原來「大鳴大放」過終點後因場地濕滑跣腳，搞到左前腳受傷，最後仲要由運馬車送走。雖然暫時傷勢有幾嚴重都未知，但幕後一心安排呢匹馬遠征法國凱旋門大賽嘅夢想，依家只能幻滅。

隨住「榮進之光」回歸日本，「氣概凜然」又唔去遠征，依家「大鳴大放」又傷埋，唔通今年法國凱旋門大賽，冇日本馬去打爆機？咁又未必，事關應屆日本打吡冠軍「豐收節」已經鐵定遠征法國，先跑尼爾錦標再攻凱旋門，兼且決定改由依家喺日本發展嘅法國好手李慕華掛帥，睇吓佢可唔可以幫日本首次打爆機啦。

26/06/2016

【砌低意國型男！蛯名正義爆鑊甘】

這天沙田馬場第四場賽後，馬會從日本阪神競馬場，轉播寶塚紀念賽來港受注，編為海外第一組第一場(S1-1)。

呢場國際一級賽跑草地2200米，路遙知馬力，意國型男杜滿萊策騎的「大鳴大放」（9號）成2.4倍大熱門，另一位歐洲好手李慕華的「朗日清天」（7號）為3.7倍啡燈落重飛次熱門。日本國寶級騎師武豊座騎「北部玄駒」（3號）乃5.7倍第三熱門，結果全輸給冷馬「勝之石」（16號）。
其中「北部玄駒」貼欄帶到拉士至力弱被超越，「大鳴大放」當時於外叠打衝鋒，不過點衝都唔夠身旁蛯名正義操刀的「勝之石」咁勁，結果39倍的「勝之石」，一舉殺晒三大熱門，並以雌馬身份勝出本屆寶塚紀念賽，頭馬獎金約1,140萬港元，練馬師是久保田貴士。
五歲雌馬「勝之石」至今17戰得6冠2亞5季，去年秋天攻下女皇伊利沙伯二世盃（2200米），取得其首項一級賽冠軍，去年12月在一級賽有馬紀念賽（2500米）中居第四名過終點，以及上月在二級賽目黑紀念賽（2500米）中僅以一馬頸之差跑獲亞軍。
至於「大鳴大放」及時趕過「北部玄駒」，以第二名完成賽事，「北部玄駒」得第三，「朗日清天」姍姍來遲只得第四，連累落飛黨WP齊撻輸到暈暈哋，四重彩派二萬一千幾。

這天沙田馬場第四場賽後，馬會從日本阪神競馬場，轉播寶塚紀念賽來港受注，編為海外第一組第一場(S1-1...

25/06/2016

【出道八戰全入Q 大鳴大放只怕一樣嘢】

日本星級賽駒「大鳴大放」出道八戰獲五冠三亞，三月中牠曾遠征杜拜，出爭2410米草地國際一級賽杜拜司馬經典賽，結果敗給「容後再決」跑第2。本周日這匹由堀宣行訓練的賽駒將再作回歸後首戰，列陣2200米一級賽寶塚紀念賽。然而今仗卻是「大鳴大放」首次在阪神競馬場出賽，騎者杜滿萊表示：「賽事會在內跑道進行，該跑道的直路較短，但我認為牠將可應付自如。」

當地天氣預測指周日可能下雨，這對四歲的「大鳴大放」來說可能構成挑戰。杜滿萊亦承認天氣差劣，「可能會對座騎構成一點影響。」他補充說：「然而，牠體格強壯，實力過人，我十分希望牠能夠奪冠而回。」杜滿萊自今年2月至今，一直未能贏得大賽頭馬。

日本星級賽駒「大鳴大放」出道八戰獲五冠三亞，三月中牠曾遠征杜拜，出爭2410米草地國際一級賽杜拜司馬...

25/06/2016

【夏辛村要稱霸英愛】

應屆葉森打吡盟主「夏辛村」，今日將於卻拉馬場復出，與其餘八匹對手爭奪愛爾蘭打吡冠軍寶座。翻查歷史，過去曾有17駒能包辦英愛打吡孖寶，首匹為1907年Orby，而最近一匹則是2004年嘅「澳大利亞」。若然「夏辛村」再下一城的話，則是其馬主阿加汗歷來第四匹自行培育賽駒囊括這兩項經典賽，過去三匹分別為1981年「識價」、1988年「確也是」及2000年「先力達」。

能阻止「夏辛村」完成任務的，當然包括力爭個人第12次愛爾蘭打吡殊榮的岳伯仁，雖然原先主力「巡邏兵」因健康問題退出，但仍有四匹廐侶派上戰場，焦點落在改由莫雅操刀的葉森打吡季軍「愛達荷州」身上，同母兄長「高地之舞」早前在夏域錦標飲恨，且看其弟能否於今場大賽補中。
此外，香港馬主夏佳理名下的「紅翠」，繼早前付出75,000鎊後補報跑葉森打吡得第六後，今次再畀多10萬歐元加入競逐愛爾蘭打吡，並續交蘇兆輝策騎。愛爾蘭打吡於本港時間周日凌晨12時20分開跑，又睇吓「夏辛村」能否完成使命！