09/06/2026
ወጣትነት ለዘላቂ ሰላምና ልማት!
የምዕራብ ጎጃም ዞን ብልጽግና ፓርቲ ወጣቶች ክንፍ ጽህፈት ቤት ከዞኑ የሥራ አስፈጻሚ አባላት እና ከየደረጃው ከሚገኙ የክንፍ ኃላፊዎች ጋር በበየነ-መረብ (Zoom) ያካሄደው ስልታዊ የምክክር መድረክ፤ ወጣቱን ከቀጣይ የልማት፣ የዴሞክራሲ ሥርዓት ግንባታና የዘላቂ ሰላም አጀንዳዎች ጋር ያቆራኘ ታላቅ ፖለቲካዊ ንቅናቄ ነው። በመድረኩ የ7ኛው ሀገራዊና ክልላዊ ምርጫ አፈጻጸም ሂደት የተገመገመ ሲሆን፣ ወጣቱ የፖለቲካ ውሳኔ ሰጪነቱንና የሰላም ጠባቂነቱን በተግባር በማሳየት ለዴሞክራሲ ሥርዓቱ መጎልበት ያበረከተው ታሪካዊ አስተዋጽኦ በግንባር ቀደምትነት ተነስቷል። በተጨማሪም ባለፉት 11 ወራት የተከናወኑ መደበኛ የዘርፉ ተግባራት በጥንካሬና በድክመት ተገምግመው፣ የታዩ ውስንነቶችን በቁርጠኝነት በማረም የወጣቱን ሁለንተናዊ ተሳትፎና ፍትሐዊ ተጠቃሚነት በሁሉም መስክ ማረጋገጥ እንደሚገባ አጽንኦት ተሰጥቶታል።
ይህ መድረክ መደበኛ ግምገማ ከመሆን ባለፈ፣ የወጣቱን ፖለቲካዊ ንቃተ-ህሊና ከማህበራዊ በጎ ፈቃድ አገልግሎት ጋር በጥምረት ለማስቀጠል ስልታዊ ድልድይ የፈጠረ ነው።
በመጪው የክረምት ወራት የሚከናወኑ የተቀናጁ የዜጎች በጎ ፈቃድ አገልግሎቶችን (የአቅመ-ደካሞች ቤት ግንባታና ጥገና፣ የአረንጓዴ አሻራ፣ የደም ልገሳና የትምህርት ድጋፎችን) በንቅናቄ ለመምራት የጋራ መግባባትና ዞናዊ አቅጣጫ ተቀምጧል።
እነዚህ ተግባራት ማህበረሰባዊ ትስስርንና አንድነትን ከማጠናከራቸው በላይ፣ የወጣቱን ጉልበትና ዕውቀት ወደ መሬት በማውረድ የሕዝባችንን የኑሮና የኢኮኖሚ ጫና በከፍተኛ ደረጃ የሚያቃልሉ በመሆናቸው፤ መላውን የዞኑን ወጣት በአንድነት በማንቀሳቀስ ዕቅዱን በላቀ ስኬት ለመወጣት ቁርጠኝነት ተፈጥሯል።
የወጣቶች የፖለቲካ ንቃተ-ህሊናን እና የበጎ ፈቃድ አገልግሎትን የማስተሳሰር ስልታዊ ንቅናቄ!
