22/07/2026
في معارك في الشغل لو دخلتها… حتى لو كسبت، هتطلع خسران.
في بيئات عمل سامة بتشدك لمنطقتها من غير ما تحس. تبدأ وأنت داخل بقيمك، هدوءك، احترامك، وطريقتك النظيفة. تقول: أنا مش هتغير. أنا هفضل زي ما أنا. أنا هعرف أتعامل.
وبعد شوية تلاقي نفسك بقيت ترفع صوتك علشان صوتك يتسمع. تشك في الناس علشان الكل بيشك. ترد بقسوة علشان القسوة بقت اللغة الرسمية. تدخل في نكد ومقارنات وإشاعات وتصفية حسابات… وانت أصلًا كنت داخل تشتغل.
المشكلة إن البيئة السامة مش بتنتصر عليك لأنها أقوى.
بتنتصر لما تخليك تلعب بقواعدها.
تخليك تبقى شخص مش شبهك.
تبقى عصبي. دفاعي. حذر زيادة. شايل الشغل على صدرك حتى في البيت. تنام متوتر وتصحي تقيل قبل ما اليوم يبدأ.
وساعتها تسأل نفسك: أنا بقيت كده إمتى؟
في شركات الصراع فيها مش استثناء. ده نظام. اللي يقلل منك يبان قوي. اللي يشتم يبان حاسم. اللي ينشر كلام يبان فاهم اللعبة. واللي محترم وهادي يتقال عليه ضعيف أو مش عارف ياخد حقه.
بس الحقيقة إن مش كل معركة تستاهل تدخلها.
ومش كل مكان يستاهل تثبت له إنك صح.
وأحيانًا الانتصار الحقيقي مش إنك تفضل وتحارب، الانتصار إنك تمشي قبل ما المكان يسرق منك أخلاقك وراحتك ونفسك.
احمِ قيمك زي ما بتحمي مرتبك.
واحمي سلامك النفسي زي ما بتحمي مستقبلك المهني.
لأن في أماكن مش هتخسرك شغل بس… هتخليك تخسر نفسك وأنت بتحاول تكسب موقف.
#احمدعبدالسلام
