Abdelrahman Ahmed - عبدالرحمن أحمد

11/05/2026

تغور حلاوتها مادام
الحلو مش ليا
هتيجي المهرة مادام
الفرسة مش جاية
ماكلش اللقمة لو حد
بصلي فيها اموت مسموم
يحب القلب قصاد قلبه
بدون انداد ولا خصوم
يبص القلب ف عنيها
بتحرق شجر وورود
ينسي انه يوم طعن فيها
وانه برئ كما المولود
ويندب نفسه انه زعلها
وينسى ماضيها وحاضرها
وينسى كل اللي بصلها
ويرجع حبها المفروض

- بودا

10/05/2026

بكون حزين وتعبان
هزيل وتعبان
يجيلي العود يغنيلي
ويسقيني غنا والحان

- بودا

19/03/2026

حبيت اهاديكم كل عام وانتم بخير 🌸🌸❤️

09/01/2026

03/01/2026

الفيديو المنتظر 😍
قصة عمارة السلاب الجزء التاني 🔥

30/12/2025

مساء السبت 30 أغسطس، وفي واحدة من أكثر لحظات الخيانة قبحًا، أقدم أحد العملاء على إبلاغ جهاز الشاباك بمكان تواجد الملثم أثناء زيارته لأسرته بعد غياب طويل.
لم يُكذّب الشاباك المعلومة، بل اعتبرها فرصة نادرة طال انتظارها بعد فشل 14محاولة اغتيال على الفور عُقد اجتماع عاجل ضمّ قادة الجيش، وصدر القرار باستخدام طائرات مُعدّة خصيصًا لاغتيال قادة المقاومة.. ورغم علمهم بتواجده في شقة محددة، قصفوا البناية كلها تأكيدًا للإصابة، وانتقامًا من العائلة كلها ..
استُخدمت في القصف صواريخ محمّلة بقنابل حرارية حارقة محرّمة دوليًا . قنابل تُطلق سحابة من الوقود المتفجر تمتد في الهواء، ثم تشتعل فجأة، مولّدة حرارة هائلة وضغطًا قاتلًا يلتهم الأجساد ويجعلها تتبخر، ويشفط الأكسجين من المكان، فلا ينجو بشر ولا حجر.
فاستُشهد بطلنا، واستُشهدت زوجته، وأطفاله: ليان، ومنّة الله، ويمان.
وتبخر جسده الطاهر بالكامل، كأنهم أرادوا محو أثره ..
واستُشهد معه 40 من عائلتة( الكحلوت)و30 مدنيًا لا ذنب لهم ..
استُشهد مُقبِلًا غير مُدبر، وقد سبق استشهاده وعدٌ وبشارة.
رؤيا قصّها على صهره الدكتور منذر العامودي، رأى فيها رسول الله ﷺ يقول له:«أنت شهيد اليوم ».
فكان صباحه اغتسالًا، وتزينًا، وتعطرًا…كأنما يُزف إلى عروسه
استُشهد بعد أن أدى أمانته، ودافع بدمه عن دينه ووطنه، فبكته الأمة، وبكته المساجد والمحاريب، وبكته ساحات الوغى.
وما حسبنا أن الشهداء يموتون… بل يرحلون ليشهدوا علينا.
تقبّل الله شهيدنا، وغفر لنا خذلاننا له.

24/12/2025

الجزء الاول من عمارة السلاب

19/12/2025

(سلاطين الجن)
*الجزء الاول*
استلمت اول شغل ليا النهاردة فى شركة حراسة
هيا الشركة مفيهاش موظفين كتير
بس مرتبها كان حلو جدا
المهم استلمت الشغل ودخلت المكتب دخل عليا شخص ومعاه ملفات طلب منى اراجعها شكله ابيضانى وشعره طويل بس فى حروق بسيطة فى وشه ونظرته كمان كانت مريبة قالى
-ازيك انا مُراد بشتغل معاك هنا ف الشركة
=اه اهلا بحضرتك انا نادر اصلا من المنيا بس نقلت القاهرة عشان الشغل واخدت سكن قريب من هنا
-اتشرفت بيك جدا ولو احتاجت اى حاجة انا تحت امرك
قعدنا نتكلم كان باين كلامه انه شخص طيب
مر اسبوع واتعرفنا على بعض وبقينا اصحاب ونروح سوا بعد الشغل واحيانا كنت بروح البيت عنده بيت كبير شوية من دورين ف منطقة مش بيسكنها ناس كتير.
مكنتش اعرف غيره هو وشخص تانى معانا فى الشغل اسمه بهجت
بهجت ده شخص ملتحى ومتدين وذوق فى الكلام بس لما بيشوفنى مع مراد بيبصلى باستغراب وكانه متضايق اننا ماشيين مع بعض.
فى يوم خلصت ورديتى وروحت البيت متأخر الساعة 10 كان الوقت متاخر عن العادى ومكنش فى حد فى الشركة غيرى انا والحارس مصطفى تحت
وانا نازل جيت اسلم عليه لقيته باصصلى بطريقة مش مفهومة قلتله
-ازيك ياستاذ مصطفى
مردش. فكبرت دماغى مشيت خطوتين لقيته بينده عليا
وقفت وبعدها قالى
=حضرتك محستش بحركة غريبة فى الشركة؟
-حركة غريبة ازاى انا خلصت شغلى وادينى مروح
=انا حاسس ان فى حد تالت معانا فى الشركة هنا حاسس ان معانا كمان دلوقتى
-قلتله وانا بضحك بسخرية :هيا التهيئات جاتلك ولا ايه مانا نازل قدامك ومفيش حد
قالى انا متأكد دى تهيئات ومش اول مرة تحصل
انا سامع صوته دلوقتى صوت معرفش جاى منين بيقولى "أنا بمووت"
انا مكنتش اعرف بيتكلم عن اى، وايه جو الرعب اللى عايش فيه ده قلتله : يا استاذ مصطفى انا تعبان وعايز انام مش هقدر اسمع للى بتقوله ده
لقيته رجع لورا وقالى: انا متاسف تقريبا تهيئات فعلا.
مشيت وانا مستغرب حد ايه اللى بيتكلم عنه وازاي اقتنع بسهولة انها تهيئات تقريبا لما حس بتريقة منى محبش انى اتريق عليه تانى فقالى كده
المهم روحت البيت والساعة ف حدود 11
كنت ميت من التعب ونمت علطول
صحيت بعدها بشوية والنور مطفى
صحيت على صوت حد فى الاوضة نادر...نادر
اتفزعت قومت من نومى وابص حواليا مين بينادى
صوت محاوط الاوضة كلها صوت مخيف ومرعب نادر...نادر
جريت افتح النور مرضيش يفتح النور قطع. فتحت الكشاف بتاع الموبايل وببص حواليا كل مكان لكن مفيش حد
اعوذ بالله من الشيطان الرجيم
اى الحلم ده
سيبت الموبايل جمبى وانا نايم عالكشاف
فجأة لقيت حد مسكنى من ضهرى
نادر.....انا بمووووت
التفت ورايا بسرعة جدا وانا ميت من الرعب لقيت مُراد ايوة هوا مُراد، وشه كله دم وشكله بشع جدا عنيه سوده
رجعت لورا عند الباب وحاولت افتحه مبيتفتحش
لقيته بيقربلى وحجمه بيكبر اكتر فى حروق كتييير ف جسمه وهدومه زى ماتكون هيا كمان اتحرقت
قرب منى ومسكنى من هدومى وانا بحاول اصرخ صوتى مش طالع صوتى مش قادر يطلع بحاول افلت منه لكن مش قادر أقاومه
مسكنى وقالى انقذنى.....انا بموت....بمووووووووت
اعوذ بالله من الشيطان الرجيم
بسم الله الرحمن الرحيم
جريت فتحت النور
انا كنت بحلم الحمدلله
كابوس مخيف
الحمدلله انه كاب.... بصيت حواليا
لقيت دم عالأرض
دم كتير وكإن فى قتيل فى الأوضة
فتحت باب الاوضة وجريت فضلت قاعد ف الصالة
الساعة كانت 4 الفجر قولت لنفسى انا هفضل قاعد لحد ماشوف المصيبة الل ف الاوضة دي اخرتها اى
سمعت اصوات تكسير ف المطبخ وحلل بتخبط ف بعض
اترعبت اكتر والنور بيطفى ويشتغل
مش عارف اعمل اى ولا اروح فين
حاولت اخد نفسى واكون هادى
انا اكيد لسا بحلم
فتحت كل الانوار ودخلت المطبخ اشوف الل بيحصل
لقيت ورقة فى الارض ورقة قديمة نصها محروق
مكتوب فيها طلاسم كتير مش مفهومة طلاسم سحر
وكان ف اخر الورقة مكتوب
"انقذنى.... انا بموووووت".------------------------------------

تابعوا الجزء التانى🔥🔥
مستنى رأيكم فى التعليقات

(عبدالرحمن أحمد)

15/12/2025

عمارة السلاب
(مزيج من الخيال المرعب والواقع الأكثر رعبا)
بودا ووائل وجورج
٣ اصحاب من اسيوط موظفين في البنك
اخدوا اجازة ٤ ايام م الشغل وقرروا انهم يخرجوا ويسافروا القاهرة منها يغيروا جو وكمان يشتروا شوية حاجات.....
في الساعة ٦ صباحاً كان وصل الباص اعتاب القاهرة
قرر جورج انه يبات عند ناس قرايبه ويرتاح من السفر ويبقا يقابل بودا ووائل
أمّا بودا ووائل فعملوا حسابهم هيباتوا عن صاحب وائل
صديق وائل عنده شقة في زهراء مدينة نصر تحديدا في منطقة اسمها السلاب
ومن بداية الطريق كان الاستاذ نور صديق وائل بيتواصل معاه وبيقوله ان مفيش شبكة ف البيت واحتمال الاتصال يتقطع بينهم
فوصفله الطريق ومكان البرج وازاي يوصل بعد حوالي ساعتين معرفوش يوصلوا لمكان البرج
واخيرا بالكاد وبعد وصف الناس للبرج وصلوا بسلام
عارفين المثل اللي بيقول (اليوم باين من اوله)
ده بالظبط اللي حصل مع بودا ووائل
اول ماوصلوا قدام البرج كان برج كبير تحسه محروق او مبنى قديم جدا لدرجة انك تحس شبابيكه وحيطانه محروقة
ومع دخولهم البرج الشبكة اتقطعت عن العالم
حاولوا يشوفوا اي حد في البرج طالع او نازل يسالوه عن شقة الاستاذ نور
لكن مفيش حد
البرج من منظره مخيف ،السكون اللي فيه مرعب الانوار الضعيفة اللي تحسها مايلة للازرق ومخلية نص الطرقة ضلمة واللي يدوب تبين ملامح اي شخص
اخرج وائل الموبايل تاني وشاف الرسايل لقاه بيقوله (الدور التاني)
طلعوا عالسلم لحد ماوصلوا للدور التاني لكن برده مفيش حد مفيش صوت لاي شقة من عشرات الشقق اللي قدامهم
والجو مفيهوش غير بس صوت موتور المياه اللي في البدروم جمبهم
بودا ووائل قلبهم اتقبض من شكل البرج والدور اللي تحس ابوابه هيا ابواب قبور مش ابواب بيوت بودا قال لوائل : بقولك ايه انا مش مرتاح للمكان ده
وائل: اصبر بس تعالى نخبط على اي شقة جايز حد يرد ويقولنا شقة استاذ نور فين
بالفعل بدأوا يشوفوا اي شقة نورها مولع او لمبة الطرقة قدامها مولعة عشان يستنتجوا ان فيها حد ويخبطوا
وبدأوا باول شقة يخبطوا ويرنوا ومفيش حد بيرد
جربوا شقة تاني برده مفيش حد بيرد جربوا تالت برده نفس الكلام
لحد ما سمعوا صوت جوا شقة م الشقق بدأوا يخبطوا وحسوا بامل انهم خلاص مش لوحدهم في العمارة لكن كانت ست كبيرة اللي فتحت ليهم
:مييين
بودا: معلش ياحجة لو ازعجناكي احنا بنسال على شقة استاذ نور
قربت الست من ورا الباب وسالتهم تاني : عايز مين يابني
وائل بصوت أعلى : شقة استاذ نور ياحجة في الدور التاني احنا بنسال عليها
الست: معرفش حد يابني اسمه استاذ نور
وائل : شكرا ياحجة
فضلوا يمشوا وهما متضايقين ان حتى الحل الاخير اللي يوصلهم للشقة فشل لكن بودا قاله : تعالى نسال الشقة دي نورها شغال برده.
خبطوا على الشقة ولكن اللي رد عليهم المرادي كان شاب في كلية هندسة
بودا : حضرتك بنسال على شقة استاذ نور
اول مالشاب فتح الباب الدنيا ضلمة جوا لدرجة انهم مش شايفين الشاب ده
اللي ظاهر هو بس ضلل من ورا الباب
بودا ووائل بدأوا يحسوا بقلق خاصة ان في حد فتح الباب لكن مفيش حد
وائل : حضرتك فين احنا مش شايفينك
وفجأة من قلب الضلمة ظهر ليهم الشاب ده
الشاب مصطفى : استاذ نور؟ مفيش حد هنا بالاسم ده
متاكدين انه في الدور ده؟
وائل : مش ده الدور التاني
مصطفى : ايوة بس مفيش طب انتوا كلمتوه او حاجة
وائل : المشكلة ان الشبكة قطعت في المكان كله بعد مادخلنا
مصطفى : طب ثواني هوصلكم واي فاي
طبعا الراجل استضفنا جوا عنده وخاصة لما عرف اننا جايين من سفر
بعد مافتح وائل واي فاي كان بودّا بيحاول يستوعب المكان ومنظر الممرات وارقام الشقق اللي بتبدأ ب ٢٠١ و ٢٠٢
سال مصطفى : كنت عايز اسالك سؤال. انا ملاحظ ان العمارة دي .
مفيهاش حد خالص بقالنا سنتين بنخبط محدش معبرنا ،محدش بينزل شغله بيروح ييجي حتى؟
قاله : مش كل الشقق مسكونة هنا وجايز يكون الناس نزلت شغلها قبل ماتيجو
وبعدها ساله : انا كمان ملاحظ ان البرج كبير شكله غريب و فخم ف نفس الوقت
راح بصلي كده وقالي :
البرج ده زمان كان فندق قديم واتحرق واتحول مع مرور الوقت لعمارة
وائل وبودا اول ماسمعوا الجملة دي قلبهم اتقبض
هما فعلا من ساعة ما دخلوا حاسين بحاجة متطمنش
عايشين ف اجواء رعب
ولكن حاولوا يعدوا الموضوع
وائل طول الفترة دي كان مستني نور يبعتله يقوله مكان الشقة ولما رد نور ساله قاعدين ف شقة رقم كام
فوائل سال مصطفى على رقم الشقة
وبالرغم ان رقم الشقة ماهو الا صدفة بحت الا ان رده خلا وائل حس انه مش قاعد مع شخص عادي
مصطفى قالهم انهم في الشقة رقم ٢٠٧
وائل بدأ يسجل ريكورد لنور وبيقوله رفم الشقة : احنا ف الشقة رقم 207 ولكن مكملش الرقم
لوهلة الغرفة ٢٠٧ هي اول حاجة جت ف بال وائل
قاعدين في فندق قديم واتحرق واتحول لعمارة سكنية
والشقة الل احنا قاعدين فيها كانت ف يوم الغرفة 207
وائل سال مصطفى بكل تلقائية وهزار : احلفلي بالله انك مش عفريت
بودا ووائل ضحكوا
وبعدها بودا قاله : شششششش اسكت ليعرف اننا كشفناه ونتلبس
برغم انه مصطفى اتحرج وبغض النظر انه قعد فترة يستوعب الافيه اصلا
الا ان بودّا كان ليه نظرة تانية
وارد فعلا يكون كل ده صدفة
بودّا كان بيحاول يعقلن الأمور على قد مايقدر عشان عالاقل يكسر الخوف

المهم فضلوا قاعدين لحد مانور رد ووصفله اخيرا الشقة اللي هيخبطوا عليها
وائل طلب يدخل الحمام وطلب من بودا يخبط عالشقة لحد مايخرج
بودا راح يخبط على شقة استاذ نور لكن محدش بيرد بعد مارجع لشقة مصطفى لمح ان حد بيبص من عدسة الباب وبعدها لمح حد بيمشي ويروح وييجي
اكيد في حد جوا والمفروض يرد
راح تاني بسرعة يخبط عالباب وفضل يخبط محدش بيرد
وفضل كده لحد ماخرج وائل من الحمام حكاله بودا عاللي حصل ولكن لاحظ ان وائل مش على بعضه وكإنه ماصدق خرج من الحمام جوا كإنه شاف حاجة خلته مخضوض ، قال لبودا ان نور كتبله بإن مفيش حد موجود وانه زمانه جاي وطلب وائل من بودا انهم يمشوا من شقة مصطفى
مصطفى بعدها سالهم : انتوا متاكدين انها الشقة دي؟
اصل الشقة دي ساكناها ست وبنتها
وائل : ست كبيرة؟
الشاب مصطفى : ايوة
وائل بيضحك بخوف : دي امه والله يرحمها
بودا برق وبيضحك في نفس الوقت وجواه شعور خليط من الخوف والقلق والضحك هو متأكد ان في حد في الشقة ومرضاش يفتح
، بودّا لاحظ. ان وائل عايز يخرج من الشقة بسرعة وعمال يهمسله : يلا بينا احنا
والتفت لمصطفى : طب ياباشا احنا معلش عطلناك وقلقنا نومك احنا هنستناه لما ييجي
سلموا عليه وشكروه وخرجوا من الشقة وفضلوا قاعدين في الممر بتاع السلم
بودا : يسطا والله في حد جوا. ي اما هيا الشقة وحد جوا ي اما في حد جوا بس مش هيا الشقة
، بودا ملاحظ ان وائل شكله متغير وماصدق خرج من شقة مصطفى
وفجأة وائل قال لبودا : انت عارف شوفت اي في الحمام جوا وعارف ليه كنت عايزك نمشي بسرعة
بدا يحكي وائل لبودا اللي شاف و بدا يحس بخوف وجسمه يتجمد مكانه من الخوف
وائل اول مادخل الحمام حس بسخونة رهيبة ،منظر الحمام وشكله ميدلش أبدا ان في حد ساكن ف الشقة وان شخص بيستعمله
اللمبة اللي بتهتز وعمرها الافتراصي بينتهي
الحيطان والارض اللي مليانين تراب
حنفية الحوض اللي كلها صدى والاغرب هو نقط الدم المتجمدة الموجودة عالحوض
وفجأة وائل قال لبودا على اكتر حاجة مكانوش يتخيلوها
وائل لما بعت لنور ووصفله الشقة
نور فضلت شايف الرسايل ومتكلمش لحد مافجاة قاله : الشقة اللي انت بتقول عليها دي بقالها شهوور فاضية
وائل بيقول : انا كان هيغم عليا من الخوف وكنت هموت واشغل قران وانا ف الحمام بس خوفت فشغلت اناشيد لماهر زين لحد ماطلع بسرعة م الحمام
فجأة وائل لقا ان الواي فاي قطع لوحده رغم انه ف مسافة قريبة منه
حاول يدور عالاسم اصلا مش لاقيه
وفجاة الاتنين جالهم شعور ملوش وصف
خدوا بعضهم وطاروا عالسلم اخدوها سبرينت عشن ينزلوا بسرعة
عارفين مثل (اللي رقصت عالسلم لا فوق شافوها ولا تحت سمعوها)
بودا ووائل طول ماهما نازلين عالسلم
بودا كان بيرقص ووائل يلطم

لحد ماخرجوا م العمارة وقرروا يقعدوا ف اقرب كافيه يستنوا نور ومنها ياخدوا نفسهم ويرتاحوا من الرعب اللي شافوه في العمارة
واخيرا وبعد فترة مش كبيرة
نور رن ع وائل وقاله انه تحت العمارة مستنيهم
وصلوا عند اول العمارة سلموا عليه وطلعوا
ولما وصلوا للدور التاني فتحلهم الشقة ودخلوها وريحوا جسمهم وساب المفتاح مع وائل وهو ماشي بودا سأله انه لمح حد ف الشقة كان موجود من عدسة الباب
ولكن نور قاله ان مفيش حد ف الشقة هوا عايش لوحده ومكنش موجود وقتها
وبعدها قفل الباب ونزل......
بودا تغاضى عن الموضوع وحاول يقنع نفسه انها مجرد تهيآت
مع انه شاف كده هوا ومصطفى
لحظة!!!! مصطفى!
لما عدوا ع باب شقته لقوه....!!!
يارب يطلع تهيآت فعلا
جري هو وائل عشان يشوف شقة مصطفى لقوا
الباب الحديد مقفول بالقفل من برا
اللي هو ازاي ،صباح الفل
فجأة وائل وبدون مقدمات وقف قدام الشقة ورفع ايده جمب راسه وقال : ارقد في سلام يامصطفى الف رحمة ونور عليك ياحبيبي
ورجعوا الشقة تاني مش فاهمين حاجة ومرعوبين من الل شافوه
٤ ايام هيقعدوهم ومن اول ساعة شافوا كل ده
حاولوا يتخطوا كل اللي حصل واهي ٤ ايام وهتعدي
دخلوا ارتاحوا غيروا هدومهم وناموا ونزلوا بليل قابلوا جورج
وعدى اول يوم وتاني وتالت عايز اقولكم ان طول الايام دي كانوا عايشين ف رعب
كل شوية يسمعوا صوت من المطبخ مرة خبط ومرة اصوات اطباق ويدخلوا يشوفوا في ايه ميلاقوش حاجة بيحاولوا يقنعوا نفسهم انها شقة جمبهم
ولكن احيانا المطبخ نوره يولع ويطفي وبرده بيحاولوا يشيلوا الخوف من جواهم باي طريقة ويحصنوا نفسهم بايات من الذكر الحكيم بس عشان ميتملكش منهم الخوف
بيحاولوا يمشوا الدنيا ويقولوا يمكن فار ولا برص
ولكن مع تالت يوم الصبح صحي بودا عالساعة ٩ على صوت وائل وهو بيناديه بصوت واطي لسا بودا بيستوعب وائل فين عشان مش شايفه نايم ع سريره لقاه جمب السرير مقرفص وخايف جدا من حاجة
لقاه بيقوله : انت كل ده نايم انا بقالي ساعة بصحي فيك
انت مسمعتش اي صوت خالص وانت نايم او مصحتش خالص؟
بودا مش فاهم حاجة فقاله : مالك يابني في ايه وليه قاعد كده اصلا انا مصحتش غير دلوقتي لا
قاله : مسمعتش صوت خبط ورزع عالباب برا؟
قاله : خبط!! لا خالص انا نايم الساعة 5 ميت على نفسي م التعب ، بس هو مين الل كان بيخبط؟
وائل فجأة معرفش : انا كنت نايم معاك وعالساعة ٨ لقيت حد بيخبط زي مايكون هيكسر الباب
جريت عشان اشوف مين ابص م العين السحرية ملاقيش حد
خوفت واترددت افتح ورجعت الاوضة تاني لقيت الخبط بدأ من جديد والمرادي كان اجمد
بس قررت اشوف مين بيخبط جريت بسرعة لقيت اتنين ماشين مع بعض هما الل كانوا بيخبطوا
فتحت الترباس بسرعة وفتحت الباب ولكن..... ملقتش حد
الممر بتاع الدور هوسسس مفيش مخلوق
بسرعة قفلت الباب وجريت وفضلت قاعد القعدة الل انت شايفني بيها وقعدت اصحي فيك
بودا ووائل فضلوا قاعدين مش عارفين يعملوا ايه
هما اصلا الشقة اللي قاعدين فيها تخوف هيا كمان
قرروا انه يكون اخر يوم وياخدوا بعضهم ويحجزوا جو باص ف اقرب وقت على اسيوط
اتصلوا بجورج حكوله الل حصل وانهم هيمشوا من هنا بسرعة
بعد مالموا حاجتهم وبيقفلوا الباب
فجأة لقوا شاب بيفتح الشقة اللي ساكن فيها مصطفى
سالوه عنها وعن شاب شافوا م ٣ ايام اسمه مصطفى
ولكن رد عليهم الشاب ده وقال ان فعلا في حد ساكن معاه اسمه مصطفى ولكن مبيجيش واخر مرة شافه من اسبوعين لما جم سكنوا الشقة ، جايز يكون بييجي ف الوقت اللي مش بيبقا موجود فيه وجايز لا
شكروه ومشيوا ولكن وهما ماشيين سمعوا صوت خبط في الشقة اللي كانوا فيها وكرسي زي مايكون حد بيحركه من مكانه
بصوا وراهم لقوا نفس المشهد اللي شافه بودا ف اول يوم ، حد باصص عليهم م العين السحرية
بودا ووائل جواهم 100 شعور و100 سؤال واستفهام ماصدقوا خرجوا م الشقة والحمدلله انها جت على قد كده
نزلوا جري من البرج
سلموا المفتاح للورشة اللي تحت البرج وقرروا يرجعوا بلادهم
كانت مغامرة مثيرة بالنسبالهم تجربة عاشوا جواها فيها الغموض اكتر من الرعب كان جواهم شعور حب المغامرات والاستمتاع بالخوف وتخيلات العفاريت و الذهاب لكل ما هو غير مفهوم
، حتى الان هما مش عارفين مين الل كان جوا
قدروا يفسروا قصة مصطفى وقدروا يفسروا الصوت الل بيسمعوه وقدروا يفسروا الناس الل خبطت عليهم الصبح دول كانوا عمال نظافة ولما لقوا مفيش حد فتحلهم نزلوا السلم واختفوا ف لمح البصر كعادة عامل النضافة انك متلحقوش
تفتكروا انتوا بقا مين اللي كان بيبص م العين السحرية؟

عبدالرحمن احمد

#رواية

09/08/2025

اللهم اجعلنى أسجد لك باكياً من حلمٍ ظننته مستحيلاً فتحقق". ♥️🥹