22/07/2024
السلام عليكم و رحمة الله و بركاته ...
من الحاجات الى تقريبا محدش بيتكلم عنها فى الجروبات بتاعتنا ك IT هى اجهزة الحضور و الانصراف , مع انها اجهزة اساسية فى اى مكان و ال IT بتكون عليه مسؤلية اختيارها و تشغيلها , و خلينى اقولك ان بالاجهزة دى ممكن تسيب بصمة فى مكان شغلك لو استخدمتها صح و توفر عليهم كتير كوقت و فلوس .
فى البوست دة هجيبلك الخلاصة فى موضوع اجهزة الحضور و الانصراف , اغلب اجهزة الحضور و الانصراف فى حته ال Hardware شبه واحدة مفيش فروقات واو مبينهم , هتلاقى فروقات مثلا فى جودة الكاميرا الى بتلقط صورة الوش كمثال بس مش الفرق الى هوا فرق السماء من الارض , لكن الفروقات الحقيقة هنا فى البرنامج الى بيدير الاجهزة دى .
طيب على اى اساس بنشترى جهاز الحضور و الانصراف :
1- طرق تسجيل الحضور و الانصراف : سواء ببصمة الاصبع او بالوجهه او بالكارت و انا كمحمد بفضل بصمه الوجهه عن بصمة الاصبع علشان ميكونش فى تلامس للجهاز بين الموظفين , وكمان بعض الاشخاص بيكون فى مشاكل فى الاصابع بتخليهم مش بيعرفوا يستخدموا الجهاز , بس استنى الاجهزة الى بتشتغل ببصمة الوجهه نوعين نوع بيعتمد على منطقة العين ودة دقته قليلة و مش بيظبط اوقات , ونوع بيعتمد على الوجهه ككل (نفس فكره ال face regions الى فى الموبيلات ) ودة ادق و اسرع و افضل مش عايز اصدمك واقولك انو يقدر ياخد بصمة 50 شخص فى دقيقة بعكس الاجهزة الى بتعتمد على منطقة العين الى ممكن تاخد بصمة 25 ل 30 شخص فى دقيقة
2- السعه : المقصود هنا الجهاز بيدعم كام مستخدم على كل نظام تسجيل بصمة سواء اصبع او وجهه او كارت
3- البطارية الداخلية : و صدقنى دى مهمة جدا علشان لما النور يقطع الجهاز يفضل شغال
و خلينا اقولك بعد شوية تجارب و بحث و استخدام ان Bio Time 8.5 اعظم برنامج بيدير اجهزة الحضور و الانصراف بمنتجات ZKTeco , فلو انت عايز تبنى نظام حضور و انصراف احترافى انصحك بية و بجهاز من ZKTeco , اما لو محتاج مجرد جهاز الناس تسجل عليه حضور و انصراف فتقدر تستخدم اى جهاز تانى .
من اول 5000 جنيه هتعرف تجيب جهاز بيشتغل بصمة وجهه واصبع و كارت لكن هيكون مجرد جهاز بتطلع منوا تقارير حضور و انصراف و بس و حساب تأخيرات و خلافة ودة اى جهاز يقدر يعمله , طيب لو طلعت ل 10000 جنيه هتجيب جهاز من الاجيال الجديدة الى فيها بصمة وجهه كامله و كمان بيشتغل على Bio Time 8.5 الى هيديك ممزيات كبيرة جدا زى :
1- اول ميزة هيا multi user بمعنى ان اكتر من ادمن يقدر يستخدم البرنامج , وكل ادمن لية صلاحيات غير التانى و كل ادمن بيعمل شغل غير التانى
2- ثانى ميزة هيا ال work flow المقصود بيها هنا انك تبنى نظام تسلسل للعمل سواء الحصول على الاجازات او الغياب او او او و دة من خلال ان كل موظف فى الشركه بيكون عندة صفحة على البرنامج فيها كل اذوناته و غياباته و حضورة و و و , و م خلالها يقدر يطلب اجاهزة او اذن و يتبعت لمديرة يوافق علية او يرفضة , كل دة بدون استخدام اوراق
3- تقدر تستخدم البرنامج كبرنامج HR تسجل فية بيانات الموظفين و تحط فيها كمان صور من الشهادات بتاعتهم و اوراقهم
4- حساب الاضافى و الخصومات سواء بواسطة المحاسبين اوا ل HR
5- ودى ميزة بفلوس مستقله و هيا ال Mobile app الى من خلالها تقدر تخلى الموظف يبصم من اى مكان , و يتحكم فى كل شيئ يخص غيابه وحضورة و انصرافة و خلافه
6- تقدر تعمل شيفتات للموظفين و مواعيد عمل و مواعيد للبصمة و حاجات تانية كتير
7- تقدر تستخدم البرنامج عند الامان لتسجيل الزوار بدلا من التسجييل فى دفاتر
8- و كمان تقدر تخلية يشتغل مع ERP
هل كل دة ببلاش ؟ بص ال BioTime 8.5 مجانى على جهازين حضور و انصراف او 2000 مستخدم غير كدة هتشترى رخصة ب 10 الاف جنية تشغلك 5 اجهزة
الخلاصة هنا لما تجيب جهاز حضور و انصراف قدامك سكتين مجرد جهاز بصمة او نظام حضور و انصراف , انا عارف ان الاختيار التانى متعب ليك و فية شغل كتير بس خليك عارف ان اصحاب الشركات كل هدفهم تقليل مصاريف فلو عندك نظام يدوى او روتينى للحضور و الانصراف و انت بنيت نظام ديجتال محترم فدى هتبقى نقطة فى صالحك فى الشغل , خليك دايما مبتكر و متجدد و بص لقدام و خليك مختلف عن الى حواليك .
ولو عندك اى سؤال تقدر تسئلة هنا او فى جروب التليجرام
متنساش تنضم لقناه التليجرام بتاعتنا :
https://t.me/+-66bEwyQNxRkMjE0
شكرا و بالتوفيق
لا تنسونا من صالح الدعاء
ولو عجبك البوست اعمله شير و خليك فاكر ان زكاة العلم نشره
Mohammed Ghareeb - Life
