03/12/2024
الضيف الملهم ذائع الصيت أصيل الحيثية ورائد الأعمال السفلية:
"وأنا في تانيه إعدادي كنت بربط الكوتشي لوحدي"
"كنا بناخد المياه في زمزمية نسبة إلى ماء زمزم، كنا بنعرف ربنا"
"مكانش فيه حاجة اسمها لانش بوكس عشان البوكس ساعتها كان في خدمة الشعب"
"كنت باخد مصروف ربع جنيه في اليوم بحوش نصه وأطلع أوربا في الصيف أخد كورسات تنمية بشرية"
"إتولد، إتفطم، إتعلم، سافر، أصرف فلوس كتير، إنبسط، إتجوز، خلف، إتوفى"
"بدأنا فقرا جدا، وكافحت من الصفر، كان جدو حبيبي الله يرحمه كل أسبوع يجيب الفلاحين ينقوا القمل من راسي"
"لغاية دلوقتي بروح أصيف في العجمي مع الناس العادية وأبص لبحرها وأنا بشرب السيجار وأقول هنا عملت أول مليون.. متر مكعب مايه"
"أول مشروع عملته في حياتي كان صالة حديد، في صالة البيت عندنا وكنت بحصل الإشتراك من إخواتي"
"بعشق المسرح التجاري، كنت بتجنن من قدرة بعض الكومديانات الكبار على إضحاكنا بإفيه ميضحكش بعد إعادته 427 مرة"
"أنا ضد صراع الأجيال، وزمايلي الشباب الجداد ما شاء الله عليهم فاهمين تكنولوجيا أحسن مني ويقدروا يفكو باسوورد الكمبيوتر المركزي للمؤسسة اللي أنا محتفظ بيه، شوية إجتهاد بس!"
"الولد الصغير بيمسك الموبايل بيعمل حاجات عليه، بيدهشني! مرة صورلي صورة مع والدته، بس قلتلها متجيبيش ابنك معاكي بعد كده"
"فيه سر كوني مبتعرفوش إلا لما بتجتهد في الدنيا، 80% من ماتشات الأهلي والزمالك Template ثابت وبيتغير فيه اللاعيبه بس، حاجة زي الـ WWE كده، الغريبة إنهم مش بيمثلوا ولا فيه سكريبت بس بتطلع كده"
"خسرت فلوس كتير أوي لحد ما عرفت إن مش أي دكتور لازم يبقى طبيب"
"لازم يكون عندك شخصية! مينفعش تمشي ورا التريند وخلاص من غير ما تجيب منه فلوس"
"صدقني أنا لفيت العالم كله وأطلعت على تجارب الدول المتقدمة وكلهم صحابي هناك وبقولك، بالأمانة، مفيش أجمل من بلدنا"
"مفيش فرق بينا وبين الخواجات، بل بالعكس احنا أحسن. هما بيفضلوا ورا الفاشل حتى ينجح، واحنا بنفضل ورا فاشل بيك حتى يتفوق ويسلم على بابا كتير"
( وأندهش مذيع #البودكاست ) 1
